საქართველოს მედიატორთა ასოციაციის ორგანიზებით გაიმართა პირველი რეგიონული კონფერენცია, სადაც მონაწილეობას იღებდნენ აზერბაიჯანიდან, სომხეთიდან, მოლდოვიდან, უკრაინიდან მოწვეული იურისტები და მედიატორები.
აღნიშნული ღონისძიება განხორციელდა გაეროს განვითარების პროგრამისა და გერმანიის მხარდაჭერით, პროექტის „კანონის უზენაესობისა და მართლმსაჯულებაზე ხელმისაწვდომობის გაუმჯობესება ყველასთვის“ ფარგლებში.
ღონისძიების მიზანია გრძელვადიანი ურთიერთობის ჩამოყალიბების ხელშეწყობა და მედიაციის ჰაბის შექმნა კავკასიის რეგიონში
ღონისძიება გახსნეს და მისასალმებელი სიტყვით მიმართეს დამსწრე მონაწილეებს სსიპ საქართველოს მედიატორთა ასოციაციის თავმჯდომარემ ირაკლი ყანდაშვილმა და გაეროს განვითარების პროგრამის პროექტის „კანონის უზენაესობისა და მართლმსაჯულებაზე ხელმისაწვდომობის გაუმჯობესება ყველასთვის“ ხელმძღვანელმა ლევან ასათიანმა.
საქართველოს მედიატორთა ასოციაციის თავმჯდომარემ განაცხადა რომ მსგავსი ტიპის რეგიონული კონფერენციები ერთი მხრივ აღრმავებს მეზობლებს შორის ურთიერთობას რაც ძალზედ მნიშვნელოვანი და აქტუალურია დღევანდელი გლობალური მდგომარეობის გათვალისწინებით და მეორე მხრივ ეს არის პროფესიებს შორის თანამშრომლობის ძალზედ მნიშვნელოვანი პლატფორმა რომელიც ხუთი ქვეყნისთვის ხელშემწყობი იქნება განავითარონ მედიაცია რეგიონში.
კონფერენციის განმავლობაში მონაწილეებს საშუალება ჰქონდათ წარმოედგინათ და გაეზიარებინათ თავიანთი ქვეყნების გამოცდილებები.
ღონისძიებაზე ქვეყნების წარმომადგენლებმა გამოთქვეს მზადყოფნა თანამშრომლობის და მადლობა გადაუხადეს საქართველოს მედიატორთა ასოციაციის თავმჯდომარეს რეგიონში პროფესიებს შორის თანამშრომლობის იდეის ინიცირების და განხორციელებისთვის, რისთვისაც აზერბაიჯანის მედიაციის საბჭომ პერსონალურად დააჯილდოვა ასოციაციის თავმჯდომარე ირაკლი ყანდაშვილი და საქართველოს მედიატორთა ასოციაციას.
კონფერენციაში მონაწილე ქვეყნები შეთანხმდნენ რომ გააგრძელებენ მუშაობას დავის გადაწყვეტის ალტერნატიული მექანიზმის (მედიაცია) შესახებ ცნობიერების ამაღლებაზე და სამხრეთ კავკასიის ქვეყნებს შორის ურთიერთდამაკავშირებელი ქსელის დამყარებაზე.
ქვეყნებს შორის თანამშრომლობა იქნება სტაბილური და კონფერენცია მიიღებს ყოველწლიურ ხასიათს.
