დონორი ორგანიზაციების აქტიური მხარდაჭერით გრძელდება საქართველოს მედიატორთა ასოციაციის ინსტიტუციური გაძლიერებისა და განვითარების პროცესი.
აღნიშნული მხარდაჭერის ფარგლებში, ევროპის საბჭოს მიერ საქართველოს მედიატორთა ასოციაციის ადმინისტრაციის თანამშრომლებისთვის ორგანიზებულ იქნა ტრენინგი სტატისტიკური ბაზის შექმნისა და მისი ეფექტიანად მართვის შესახებ.
ღონისძიება გახსნა და მონაწილეებს მისასალმებელი სიტყვით მიმართეს საქართველოს მედიატორთა ასოციაციის თავმჯდომარემ ირაკლი ყანდაშვილმა და ევროპის საბჭოს „სასამართლოს მენეჯმენტის მოდერნიზაციის ხელშეწყობა საქართველოში“ პროექტის უფროსმა მენეჯერმა უჩა ბახტაძემ.
ტრენინგს უძღვებოდნენ უცხოელი მოწვეული ექსპერტები: იტალიის მედიაციის ცენტრის თანადამფუძნებელი, აღმასრულებელი დირექტორი - ლეონარდო დურსო და საერთაშორისო მედიატორი, ექსპერტი - კონსტანტინ ადი გავრილა.
შეხვედრა მიმდინარეობდა ინტერაქციული ფორმატით, სადაც მონაწილეებმა აქტიურად და დეტალურად განიხილეს როგორც საერთაშორისო მედიაციის მოდელები, ისე საქართველოს კონტექსტში არსებული მდგომარეობა და სტატისტიკური მონაცემები.
ტრენინგის შემაჯამებელ ნაწილში დასმული იქნა მრავალი მნიშვნელოვანი და საინტერესო კითხვა.
საქართველოს მედიატორთა ასოციაცია დონორი ორგანიზაციების მხარდაჭერით კვლავ გააგრძელებს მედიაციის ინსტიტუციის გაძლიერებასა და განვითარების მიზნით საერთაშორისო ექსპერტებთან თანამშრომლობას.
